2025 – Friluftslivets år – på tide med ei dagsturhytte?

Dette er eit meiningsinnlegg som uttrykker meininga til innsendaren

På kommunestyremøte 13.februar fremma eg på vegne av KrF ein interpellasjon med fokus på Friluftslivets år 2025 og moglegheiten for å bygge ei dagsturhytte i Aukra kommune.

I Aukra kommune har vi allereie gjennomført «Heile Norge båler». Ein flott start på Friluftslivets år. Det vert fleire aktivitetar i løpet av året. På Aukradagen er Friluftsrådet invitert til å delta. I september skal det gjennomførast aktivitetsdagar med mellom anna Sjøsportsdag og Seek and Find i Aukraskogen. Det vert og to ordførarturar i mai og september. Begge desse vert knytta opp mot Friluftslivets år 2025.

Dei aktivitetane som er planlagde og sikkert mange fleire vil kunne bidra til at endå fleire i kommunen vår blir glad i friluftsliv? Det kan ikkje vere tvil om at friluftsliv fremmar god folkehelse, dette både fysisk og psykisk.

Forholda for friluftsliv ligg godt til rette i kommunen vår. Vi har kyst og vi har fjell. Kva kan vel vere betre ein ein havkajakktur ved Sæter – eller Smågeholmane eller ein fjelltur opp til Svartnakken eller Eidskremheia? Vi bur og i eit område og i ein kommune som absolutt inviterer til flotte turar og gode friluftlivsopplevevingar.

Vi kjenner til at Vestland fylke og Agder fylke har etablert fleire såkalla dagsturhytter. I Vestland fylke har nesten alle kommunane i fylket fått bygd ei dagsturhytte. Ei dagstur hytte er open for besøk døgnet rundt, heile året. Desse hyttene skal vere ein sosial møteplass, fremme folkehelse og ikkje minst vere ein plass kor ein kan søke ly og ete matpakka. Det er ikkje snakk om store prangande hytter, men små og relativt billige hytter.

På Vår utfordring/oppfordring om å få bygd ei dagsturhytte i Aukra kommune svara ordføraren at det er fullt mogeleg for Aukra kommune å etablere ei slik dagsturhytte sjølv. Ordføraren peika på at eit aktuelt område kunne vere ein stad i Julsundmarka. Tenk om vi hadde greidd å få bygd ei dagsturhytte på Eidskremheia? Ordføraren nemnte og at det har vore lufta at vi burde hatt ein «padlehuk» i Aukra. Mange kjem til Aukra for å padle mellom Smågeholmane eller rundt øya.

I samband med KrF sin interpellasjon vart følgande forslag sendt over til administrasjonen: Kommunestyret ber kommunedirektøren sjå på moglegheiter og kostnadar ved å etablere dagsturhytte i Aukra kommune

Om vi hadde greidd å fått etablert ei dagsturhytte og ein «padlehuk», er eg sikker på at dette hadde blitt svært godt tatt imot av folket i kommunen vår, og at ei slik hytte og ein «padlehuk» også hadde motivert til endå fleire turar ut i vår flotte natur.

Jan Magne Breivik

KrF