Nytt sjukehus på Hjelset, men kjem vi oss til arbeid?

Dette er eit meiningsinnlegg som uttrykker synspunkta til innsendaren

Det nærmar seg innflytting til nytt sjukehus, Sjukehuset for Nordmøre og Romsdal på Hjelset. Frå mai 2025 skal det nye sjukehuset vere i full drift.

Tilsette og folk flest gler seg nok å  flytte frå det gamle Molde sjukehus på Lundavang i til eit nytt og topp moderne fellessjukehus for Nordmøre og Romsdal (SNR) på Hjelset.

Mange frå Aukra kommune har sitt daglege arbeid ved Molde sjukehus. Det går i dag greitt å kome seg til arbeid ved bruk av kollektivtransport.

For dei som nå skal pendle til det nye sjukehuset på Hjelset blir dei oppsette rutetidene vanskelege. Vi har fått stadfesta frå FRAM – kollektivtransport Møre og Romsdal, at det ikkje er sett opp eit rutetilbod som gjer at dei som i dag bur i Aukra og skal jobbe på det nye SNR, greitt kan kome seg til arbeidsplassen på Hjelset ved bruk av kollektivtransport. Dette gjeld spesielt dei som skal på tidleg dagvakt. Dette vil jo også gjelde pasientar som skal på time tidleg på morgonen / dagen.

Vi blir stadig oppfordra til å reise kollektivt, og både økonomisk og i eit miljøperspektiv er jo dette svært uheldig! I verste fall vil det dårlege rutetilbodet kanskje føre til at arbeidstakarar vurderer om dei lenger kan arbeide ved sjukehuset og det vil vanskeleggjere det å kome til time for ein del brukarar.

Kva tenkjer ordføraren om denne situasjonen?

Ingunn Hjelmås

Aukra KrF