Må stå saman om E39
Dette er eit meiningsinnlegg som uttrykker synspunkta til innsendaren
Fylkesstyret i Møre og Romsdal KrF meiner at regionen må samle seg om å få prosjekta på E 39 inn i Nasjonal Transportplan.
Diskusjonen om Møreaksen har gått i mange år. Dette er eit stort prosjekt, men det er også eit prosjekt som gir store moglegheiter. Nordvestlandet treng Møreaksen. Men vi treng også ny Blindheimstunnel, Voldatunnellen (som alt ligg inne NTP) og vi må få lagt E39 utanom Sjøholt sentrum. Også langs Brusdalsvatnet må E39 oppgraderast – av omsyn til drikkevasskjelda og trafikktryggleiken.
E39, er den viktigaste transportåra langs vestlandskysten. Med ei ferjefri kryssing av Romsdalsfjorden vil reisetida bli kortare og meir føreseieleg. Ferjer er sårbare for vêr, tekniske problem og kø, og vegen er i realiteten stengt store delar av døgnet. For næringslivet vårt, som lever av eksport, betyr det mykje å kunne stole på at transporten går når han skal. Vi treng god infrastruktur for å konkurrere.
Regionen vår har eit sterkt næringsliv med sjømat, maritim industri, verft, teknologi og industriarbeidsplassar i og rundt alle byane – Ålesund, Molde og Kristiansund. Kortare avstandar gir mindre reisetid, og ein større bu -og arbeidsmarknad. Det styrkar både næringslivet og lokalsamfunna.
Kritikarane av Møreaksen løftar fram kostnadene, og det er heilt rett at store samferdselsprosjekt kostar mykje. Men historia viser at investeringar i infrastruktur er investeringar i framtidig verdiskaping. Bygg vi Møreaksen vil det føre til auka aktivitet, betre mobilitet og ein sterkare region.
Ein rapport frå Samfunnsøkonomisk Analyse viser at Møreaksen kan skape rundt 1,2 mrd, i ekstra verdiskaping i regionen. Rapporten slår fast at Ålesund får den største gevinsten. Fleire kommunar får større arbeidsmarknad, næringslivet får kortare og meir stabile transportvegar, og regionen blir knytt tettare saman.
Rapporten seier også at Noreg no går inn i ein periode med lav vekst i antal unge vaksne, ei gruppe som er avgjerande for befolkningsvekst og arbeidsliv. For å møte denne utfordringa er det nødvendig med tiltak som styrkar mobilitet og tilgjengelegheit i regionar rundt byane.
Vi må også sjå dette i eit større perspektiv. Nordvestlandet konkurrerer ikkje berre internt – vi konkurrerer med andre regionar i Noreg og Europa om arbeidsplassar, investeringar og folk. Dersom vi ikkje utviklar infrastrukturen vår, vil vi sakke akterut. Dessutan vil landfast infrastruktur også ha stor betydning for beredskapen i fylket.
For mange handlar denne debatten også om identitet. Vi er ein region med sterke lokalsamfunn og stolte tradisjonar. Nettopp derfor må regionen vår våge å satse på framtida.
Møreaksen handlar om å knyte saman menneske, arbeidsplassar og moglegheiter. Det handlar om å bygge ein region som står sterkare i møte med framtida.
Nordvestlandet treng betre samferdsel. Nordvestlandet treng E39. Og no må Nordvestlandet stå samla.
Fylkesstyret i Møre og Romsdal KrF
Bildetekst: Leiar Tore Johan Øvstebø og nestleiar John Helge Frøystad i Møre og Romsdal KrF
