Nyheitsbrev frå Aukra kommune: Ordføraren om kvardagsintegrering
Dette er eit meiningsinnlegg som gir uttrykk for synspunkta til skribenten
I brev frå Integrerings- og mangfaldsdirektoratet (IMDi) 27. november 2024 vart Aukra kommune oppmoda om å busette 40 flyktningar i 2025.
Etter ein god debatt fatta Aukra kommunestyre følgande vedtak 13. februar 2025: «Aukra kommune busett til saman 30 flyktningar i 2025. 2 av dei 30 plassane vert nytta til busetting av einslege mindreårige under 15 år, og 1 av plassane vert nytta til busetting av einslege mindreårige flyktningar over 15 år. Eventuelle familiesameiningar kjem i tillegg».
I Aukra kommune har vi dei siste tre åra busett 243 flyktningar. På grunn av krig og uro, også i vår eigen verdsdel Europa, er det fortsett menneske som må flykte frå sitt eige heimland. Nokre av dei som har flykta kjem til oss i Aukra kommune.
Eining for innvandring og integrering gjer ein flott jobb. For 2024 er den totale måloppnåinga for overgang til utdanning og arbeid på heile 96%. Av 26 personar som avslutta programmet i 2024, er 25 i arbeid eller utdanning.
Det blir òg lagt ned eit stort arbeid med flyktningebarn i barnehage og skole. Kapasiteten er pressa både ved Gossen barne- og ungdomsskole og ved Barnebo barnehage. For å lette på dette trykket og for å fordele busettinga i heile kommunen er det derfor også i 2025 eit ønske om at familiar med barn i barnehage- og grunnskolealder blir busett i Julsundet. Det er ledig kapasitet både på Julsundet skole og i Bergetippen barnehage.
Under debatten i kommunestyret kom det fram klare signal om at vi har eit ansvar for å ta imot menneske som er på flukt. Det er vel ingen av oss som greier å sette oss inn i kva det vil seie å vere på flukt? Eg er usikker på kor mange det er av oss som har snakka og blitt kjent med ein flyktning?
Eg er derimot sikker på at dei flyktningane som har blitt kjent med nokre av oss lokale har kjent på auka tryggleik, auka glede og ikkje minst at ein opplever seg meir inkludert i det vi ønsker skal vere eit raust Aukrasamfunn. Kanskje nettopp denne kvardagsintergreringa kan vere ei oppfordring til oss alle i 2025?
