Søkjer deltakarar frå organisasjonar til Ungdomen sitt fylkesting

Ungdomspanelet inviterer ungdom frå organisasjonar til å delta på den viktigaste politiske møteplassen for ungdom i fylket.

Møre og Romsdal fylkeskommune melder at ungdomen sitt fylkesting går av stabelen i Ålesund, 21.-23. mars. Om lag 70 ungdom frå ungdomsråd i dei fleste kommunane møtest for å stake ut kursen for ungdomspolitikken i fylket og vedta nytt ungdomspanel. Her får dei uttale seg om kva saker som er viktigast for dei og kva visjonar dei har for fylket i framtida, heiter det i ei pressemelding frå Møre og Romsdal fylkeskommune.

For å få sikre stemmer frå ulike hald og god representasjon, er det sett av ti plassar til representantar frå lag og organisasjonar i fylket. No oppmodar Ungdomspanelet ungdom i alle typar organisasjonar til å melde seg på.

– Dette er ein svært god sjanse for organisasjonane til å påverke ungdomspolitikken i fylket, i tema som kollektivtransport, skoletilbodet, idrett og kultur. For ungdommens fylkesting er det viktig å få fram alle slags stemmer, derfor ønsker vi også at ungdom som er aktive i organisasjonar skal melde seg på, seier Magnus Smørdal, som er leiar i Ungdomspanelet.

At delegat frå organisasjonar kan delta, er ikkje noko nytt, men det er ein lite brukt moglegheit. Panelet ønsker at fleire skal bruke sjansen.

– Delegatane får ei unik moglegheit til å påverke ungdomspolitikken i Møre og Romsdal.

Vil du vere med? Du melder deg på her.