Sparkar i gang Friluftslivets år med utedag og bål

Laurdag 18. januar skal det tennast bål over heile Noreg. Lokale friluftsorganisasjonar inviterer til kjekke uteaktivitetar for heile familien i samarbeid med kommuner og andre aktørar rundt omkring i heile Romsdal.

Denne saka vart først publisert av Midsundingen

«Hele Norge båler» er startskotet for den landsdekkande feiring og markering av Friluftslivets år
2025 og gjennomførast på ulike stader i Romsdal laurdag 18. januar. Arrangementa er meint som lågterskeltiltak for å inspirere alle i heile Romsdal, også dei som ikkje er vant til å delta i friluftsliv, til å kome seg ut i naturen.

– Vi håper mange vil vere med på å samlast rundt bålet og ha ein hyggeleg utedag saman, med morosame og gratis aktivitetar for store og små, seier Maria Holo Leikarnes, dagleg leiar i DNT Romsdal. Ho understrekar at det skal vere enkelt å vere med.

– Her vi bur i Romsdal, frå innerst inne i fjordane til heilt ute ved havet, er vi så heldige å ha naturen nært på oss. Det vil vi i dei ulike lokale friluftslivsorganisasjonane bruke Friluftslivets år til å vise fram og markere! Dørstokkmila kan vere ekstra lang på vinteren, og uansett om ein er ein familie som er mykje på tur eller er meir uerfarne, kan ein kome no på laurdag og få litt inspirasjon.

Å båle er eit ord mest brukt nord i Noreg om å fyre bål og å samlast rundt det. Målet med «Hele Norge
båler» er at det i kvar bygd og by frå sør til nord fyrast opp eit bål eller fleire, og å samle mennesker til aktivitetar og bålsamtaler.

– Det er alltid plass til ein til rundt bålet, seier Linn Kaspersen og Bjørn Erik Hjelset fra Moldespeidarane. Dei er to av dei mange frivillige som er med å arrangere opningsarrangement for Friluftslivets år i Molde.

Kvart 10. år er det Friluftslivets År. Målet med at friluftslivet får ekstra merksemd over heile Noreg kvart tiande år, er å inspirere fleire til å oppdage og benytte seg av friluftslivet. Kronprins Haakon er høg beskyttar for Friluftslivets år 2025. Han oppfordrar alle gode krefter til å skape eit nasjonalt løft for gode opplevingar ute i naturen.

– I Romsdal oppfordrar vi til å oppdage og ta vare på nærnaturen din, invitere kvarandre ut og prøv nye friluftslivsaktivitetar!, seier Ragnor Alme, som er ansvarleg for aktivitet i DNT Romsdal. Han kan informere om at DNT i år har lagt den tradisjonsrike «Kom deg ut-dagen», som er Noreg sin største turdag, til 18. januar for å samanfalle med “Hele Norge båler”.

I Romsdal kan du finne arrangement fleire stader. I Molde blir det open kafe og aktivitetar ved Storlihytta, Moldemarkas Venner held bålet gåande i Isak-plassen ved Nonsmyra og ved dei nye lokala til DNT Romsdal, Romsdal kystlag og Moldespeidarane på Nøisomhed, rett sør for renseanlegget til Molde kommune, blir det mange ulike aktivitetar man kan delta på, og ordførar Trygve Grydeland kjem og opnar Friluftslivets År med å tenne bål.

I tillegg blir det tilbod om tur med frivillig frå mellom anna Retiroparkens Venner, Risken sopp- og nyttevekstforening, Naturvernforbundet og Birdlife Møre og Romsdal gjennom Retiroskogen. Turen går også innom STIKK UT vinterposten til Friluftsrådet Nordmøre og Romsdal på Retiro. Molde jeger- og fiskeforening tilbyr luftgeværskyting, husa blir opna, det serverast kaffe med meir kan Oddmund Oterhals, leiar i Romsdal Kystlag, informere om.

I Rauma blir det arrangement i Byparken på Åndalsnes med bål, tilbod om grilling, natursti, konkurranser og skileik om det er att snø når laurdagen kjem, seier Ragnor Alme, som er ein av dei ansvarlege for arrangementet i Rauma saman med andre friluftslivsorganisasjonar og Rauma kommune. På Vestnes kan du ta med turvener og familie til Kråkvika, der Barnas Turlag Vestnes er ansvarleg for arrangementet saman med Sunnmøre Friluftsråd. Her blir det bål og bålkaffe, eventyrstund og høgtlesing, lagt til rette for grilling, turquiz og andre kjekke aktivitetar, fortel Elise Glasø Lothe, som er frivillig i Barnas Turlag Vestnes.

Dette og meir til blir det altså tilbod om i Romsdal. Det blir også aktivitet i Midsund, Hustadvika og Verma. Gå inn på «det skjer» kalenderen, aktivitetskalenderen til Norsk Friluftsliv eller lokale friluftslivsorganisasjonar og finn meir informasjon om alle dei lokale arrangementa du kan delta på
førstkomande laurdag. Tidspunkta varierer noko.

– Hjarteleg velkomen ut til samling rundt bålet, grilling, turquiz, nærtur, ulike aktivitetar og møte med mange ulike friluftslivsorganisasjonar, kommuner og andre som er glade i friluftslivet, bål og nærnaturen, avsluttar Maria Holo Leikarnes i DNT Romsdal.