God jul, kjære Aukranytt-lesar!

Det nærmar seg jul og det første årsskiftet for Aukranytt. No tek avisa litt juleferie, men er på om det skulle dukke opp viktige saker – tips oss gjerne. Det er og tid for litt oppsummering av tida som har gått sidan starten 1.august.

293 saker er publiserte på aukranytt.no. Nokre har vore kjappe å lage, andre har teke tid utfrå omfang eller kompleksitet.

Evalueringa av om Aukranytt har treft som nytt produkt er i stor grad opp til dykk lesarane. Er kvar sak bra i seg sjølv med tekst og bilete, har vi variasjon i tema, leverer vi eit godt totalprodukt? Mykje er med å forme eit inntrykk.

Som redaktør er eg svært takksam for at vi har oppnådd såpass med abonnentar på desse 4,5 månadane – og for laussalet av papirutgåva. Takk for innspel, tips til saker og alle enkeltpersonar og bedrifter som har stilt opp i sakene. Denne tilgangen på aktuelt stoff er sjølvsagt heilt avgjerande for å lage ei god avis som gjer at så mange som råd vil vere med oss vidare.

2025 blir eit viktig år for Aukranytt. For å ha ei levedyktig avis må vi iløpet av dette året kvalifisere oss til å kunne motta pressestøtte. Den er avgjerande for ein berekraftig økonomi. For dei fleste aviser er eigne salsinntekter saman med den statlege tilskotsordninga som kallast pressestøtte, ein nødvendig kombinasjon.

For å utvide særpreget med nett og papir kjem vi til å variere endå meir uttrykksmåten. Tekst og bilder vil vere hovudsjangeren, men som de har sett aukar talet på videoreportasjer. Dette er noko vi vil gjere meir av.

Som eg har skrive i fleire leiarspalter i haust er det mange og mykje som fortener ros i Aukrasamfunnet.

Denne gongen vil eg løfte fram nokre av signala som både er gitt direkte og indirekte gjennom siste kommunestyremøtet i 2024. Budsjettprosessen i Aukra kommune ville nok lagt i toppsjiktet  om det fantest ei «topp ti liste» over kommuner som enkelt får endane til å møtest. Ein er på dei fleste måtar forskåna frå å måtte kjempe veldig hardt om kronene. Ein kan plusse på og ikkje stryke stillingar. Men det skjer planmessig og relativt nøkternt.

Det hadde vore fullt mogleg å «strø villt om seg» med pengar eller å forsure debattklimaet. Det finst kommuner i Noreg som på kort tid har bevega seg frå ligaen for særleg velståande kommuner, til notering på den langt mindre prestisjefylte ROBEK-lista. «Luksusfellen»-liknande framferd og rentesjokk er noko av forklaringa. 

Ei anna sak er måten kommunestyret proaktivt handsamar framtida. Eg siktar til involveringa av ungdomsrådet. Vedtekstsendringa som gav leiaren i rådet plass på talarstolen er blant dei viktigaste signala kommunestyret har gitt. Det var ei historisk og framtidsretta hending vi var vitne til då ungdomsrådsleiar, Leni Blank, for første gong 18.desember kunne legge fram rådet sine innspel til budsjettet for Aukra kommune. Og leveransen i form av førebuingane frå ungdomsrådet og Leni Blank si framføring er berre å ta av seg hatten for. Vi heiar på fleire slike «verdivedtak» frå dei godt vaksne og ungdomane som står på. Saman puttar dei aksjar i banken for bulyst i Aukra.

Eg vil også nytte høvet til å gratulere Hanne-Cecilie Sporsheim med Ingrid Espelid Hovig sin matpris. Konkurransen har vore knalltøff og dei fire finalistane svært dyktige på sine måtar. Prisen er svært fortent for det langsiktige arbeidet ho har lagt ned. Og den er ypperleg som bevis og omdømebygging for næringslivet som blomstrar grisgrendt ytst mot kysten på Gossen.

Avslutningsvis vil eg som redaktør takke og bukke for det vi saman med dykk har fått til dette første driftshalvåret.

Eg håpar du aktivt brukar Aukranytt vidare i 2025, og framsnakkar oss til andre. Vi set stor pris på deg!

Dei beste ønskje for ei riktig god jul og alt godt for 2025!

Venleg helsing

Tor Arne Aasen
Redaktør