Høgre og Ap sin sentraliseringspolitikk sløkkjer lys i lokalsamfunna

Dette er eit meiningsinnlegg som uttrykker meininga til innsendaren.

Fleire parti ynskjer å sentralisere og leggje ned vidaregåande skular i fylket. Neste år får fylkestinget ei større sak om skulestrukturen i Møre og Romsdal. Men kva og kor mange skular vil eigentleg Høgre og Arbeidarpartiet leggje ned?

Førre veke var eg i Oslo ein tur. Då eg skulle ta kveldsflyet heim att, tok det vesle widerøeflyet like så gjerne ein sveip over store deler av fylket. Ut av flyvindauget såg eg lys – på små øyer, i grisgrendte dalar og langs rota av høge tindar.

Lys som i at her bur det folk. Folk som driftar jorda, er helsefagarbeidar på den lokale eldreheimen eller bilmekanikar i nabogrenda. Folk som får hjula i samfunnet til å gå rundt. Og det var avstandar mellom lysa eg såg ut av flyvindauget. For fylket vårt er sånn, at det bur folk i heile Møre og Romsdal.

Senterpartiet meiner at ein desentralisert skulestruktur er heilt avgjerande for lys og utvikling også i framtida. Det at fylkestinget no ynskjer å utgreie skulestrukturen, der heile premissen er at vi skal sentralisere og leggje ned skular, er eit steg i feil retning.

Eit fylke med spreidd busetjing og store avstandar, krev ein skulestruktur deretter. I mange lokalsamfunn er den vidaregåande skulen ein hjørnesteininstitusjon som utdannar lokal ungdom, bidreg til levande lokalsamfunn, rekruttering til næringslivet og inkludering. Allereie no vart det føreslått å leggje ned Tingvoll vidaregåande skule, og slå saman Stranda vidaregåande med Sykkylven, men det greidde heldigvis Senterpartiet å redde i denne omgangen.

Dei som ønskjer sentralisering, peikar ofte på sparing, men realiteten er at det er lite økonomisk å hente ved å leggje ned skular. I følgje prisjusterte tal frå arbeids- og inkluderingsdepartementet kostar berre éin person i utanforskap samfunnet om lag 18,5 millionar. Våre skular skårar svært godt på gjennomføring, ja faktisk blant dei beste i heile landet. Kvifor skal vi sjanse med å gjere endringar i skulestrukturen no?

Det å leggje ned skular, og gjere store endringar i tilbodsstruktur, er noko av det mest inngripande eit fylkesting kan gjere. I denne saka Senterpartiet det er viktig at ulike aktørar skal kunne få møte politikarane og leggje fram sitt syn i ei munnleg høyring. Også dette forslaget vart nedstemt av Høgre og Frp. Ein kan jo berre spekulere i kvifor ikkje sentraliseringskameratane ynskjer å møte folk face-to-face.

Neste gong de er ute å flyr håpar eg de kan leggje vekk mobilen og sjå ut av vindauget på lysa. Senterpartiet sitt mål er at det skal vere lys på øya, i dalen og langs fjorden, også i framtida. Då er det feil å leggje ned skular.

Dordi Lerum
Fylkestingsrepresentant og stortingskandidat for Senterpartiet