Nyheitsbrev frå ordføraren november 2024 – Historia vår er viktig

Tysdag 19.november arrangerte ei aktiv og oppegåande sogenemnd eit flott kulturarrangement i Wickssalen. Fokuset for arrangementet var vår eiga historie. I løpet av kvelden fekk vi spanande og interessante glimt frå denne historia. Fortellinga om bondebryllupet på Ægra og trappesnekkaren på Gossen vart formidla levande og nært av Eivind Rød, Ludvik Solem og Karin Breivik. Eva Husøy fortalte om historia bak armringen av gull – opphavet til aukrasmykka. Alle desse tre fortellingane med meir kan du lese om i Aukra Gjennom Tidene 2023-2024 som også vart lansert under dette arrangementet. Eit hefte som kan vere ei flott julegåve.

Vi fekk og markert at det er 100 år sidan (1924 – 2024)  vi fekk Nord Aukra som kommunenamn. Då bestod kommunen vår av Gossen og Julsundet til og med Haukebø. Denne geografiske organiseringa heldt seg til 1964. Då fekk vi ei kommuneregulering kor gardane i området Gauset-Haukabøen vart lagt til Molde kommune. Frå 1965 vart namnet på kommunen vår endra frå Nord Aukra til Aukra kommune og Sør Aukra vart Midsund kommune.

Aukra kommune, eller Akerø kommune som var kommunen sitt første namn, vart danna i 1837. Det var i samband med at vi fekk formannskapslovene som danna grunnlaget for det lokale sjølvstyret. Det var den gong ein storkommune som bestod av «gamle Fræna», Julsundet til og med Haukebø, Otrøya, del av Midøy, Sandøy og Gossen.

I 1987 feira vi derfor Aukra kommune sitt 150 års jubileum. Det vart i samband med dette jubileet gjeve ut ei flott og innhaldsrik jubileumsbok. I dag er Aukra kommune 187 år. Det betyr at vi om 13 år skal feire kommunen sitt 200 års jubileum. Då må vi satse på ei ny bok og ikkje minst stor fest i Aukra kulturhus.

Det er viktig å kjenne til vår eiga historie og ikkje minst ta med oss historia når vi skal planlegge framtida. Historia gjer oss ikkje minst innsikt i korleis samfunnet har utvikla seg, kva for verdiar og normer som har forma oss, og kvifor vi er der vi er i dag. Dette er viktig for å kunne navigere framtidige utfordringar med eit breiare perspektiv. Historia vår inneheld og verdifulle lærdomar om samarbeid, konflikt, innovasjon, og motstandskraft som er viktige for å skape ei inkluderande og vellyka framtid. Kort sagt, ved å forstå historia får vi betre forutsetningar for å ta kloke val og skape ei framtid som bygger på det beste av det som har vore, samtidig som vi må unngå å gjenta tidlegare feil

Helge Kjøll jr.

Ordførar