Ona, Sandøy og Gåsøy, velkommen til Aukra kommune!

Lytt til folkeviljen, Jessica Gärtner!

Jessica Gärtner (Høgre) og eit einstemmig formannskap i Ålesund definerer folkeviljen frå 91,8% av den vaksne delen av innbyggjarane på Ona og Sandøya sitt ønske om å bli ein del av Aukra kommune som politisk omkamp. Ho og fleire av politikarane i Ålesund har tydelegvis gått lei av ei reform som vart initiert av Erna Solberg (H).  Ei reform som skulle gjere kommune- Norge meir robust, meir demokratisk og som ikkje minst skulle gje kommune-Norge mange nye oppgåver.

Om ein følgde folkeviljen kunne denne saka ha vore ferdigbehandla i 2018. Då valte derimot kommunalminister Monica Mæland (H) å både gå imot ønsket frå folket på Ona, Sandøya og Gåsøya og ei positiv  innstillinga frå fylkesmannen (no statsforvaltaren) i Møre og Romsdal. Ei lita trøst for delar av folket var at departementet vedtok at Orta fekk gå til Aukra kommune. I staden for å lytte til folket argumenter no Jessica Gärtner mellom anna med at tilsette i Ålesund kommune er utslitte av samanslåingar og greier til og med å blande inn krigen Ukraina og Midtøsten i ei sak som gjeld grunnleggjande demokratiske prinsipp.

I 2016 starta ein viktig prosess for då søkte innbyggjarar på Ona, Sandøya og Orta om å få utgreidd ei grensejustering mellom Sandøy og Aukra kommune. Søknaden hadde oppslutning på 91,8% av den vaksne befolkninga på øyane.

12.august 2016 vart det sendt eit brev til fylkesmannen (i dag statsforvaltaren) i Møre og Romsdal med ønske om at det vart sett i gang ei utgreiing av grensejustering mellom Sandøy og Aukra kommune.

28.09.2017 fekk fylkesmannen i oppdrag frå Kommunal -og moderniseringsdepartementet å utgreie grensejustering mellom kommunane Sandøy (nye Ålesund) og Aukra for øyane Ona, Orten, Sandøya m.fl.

I samband med kommunereforma vedtok Aukra kommunestyre 24.06.2016  «Aukra kommunestyre er positiv til initiativ om grensejusteringar, for eksempel ved «innbyggjarinitiativ» eller som på anna måte er naturleg, tenleg og ønska».

Når det så kom eit innbyggjarinitiativ frå bebuarar på Sandøy, Ona og Orten om å få bli ein del av Aukra kommune fatta Aukra kommunestyre følgjande vedtak på kommunestyremøte 6.febraur 2018:

1.       Aukra kommunestyre ser positivt på at øyane Sandøy, Ona, Orten, Lyngværet, Seterøya og Gåsøya i Sandøy kommune blir ein del av Aukra kommune frå 1.1. 2020, dersom dette blir vedteke av Kommunal -og moderniseringsdepartementet (KMD).

2.       Etter at kommunen har kome med eit høyringssvar til Fylkesmannen med ei fyldigare vurdering av eventuelle driftsmessige konsekvensar for Aukra kommune, vil det kome ny sak til kommunestyret

Det vart så 6.okt. 2022 tatt eit nytt innbyggjarinitiativ for utgreiing av grensejustering mellom Ålesund og Aukra kommune. På nytt søkte innbyggjarane på Ona og Sandøya Statsforvaltaren i Møre og Romsdal om at det blir satt i gang utgreiing av ei grensejustering mellom Ålesund og Aukra kommunar. Ein ønska at øyane blir lagt til Aukra kommune. Det vart og i denne søknaden vist til søknaden datert 12.august 2016.

Aukra kommunestyre forheldt seg også denne gongen positivt til søknaden om grensejustering mellom Aukra kommune og Ålesund kommune og fatta følgjande vedtak på kommunestyremøte 17.nov. 2022: «Aukra kommune er positiv til at det setjast i gang utgreiing mellom Aukra kommune og Ålesund kommune».

Alle vedtak som er fatta i Aukra kommunestyre i denne saka har vore positive til grensejustering mellom Aukra kommune og Sandøy kommune, no Ålesund kommune. I den nye søknaden vert det på nytt fokusert på at dei som står bak dette innbyggjarinitiativet seier at dei er mest retta mot Aukra og Romsdal både med omsyn til tenester og leveransar både til og frå næringsliv og private. Dei skriv og at dei alltid har vore knytt til Romsdal både med omsyn til handel, språk, kultur og tradisjonar og dei meiner at ein mindre kommune vil ha ein enklare og meir oversikteleg organisasjon, det vil vere lettare for innbyggjarane å kome i kontakt med dei som tek avgjerslene.

Denne gongen trur eg initiativtakarane ikkje berre får positiv tilråding frå Stasforvaltaren i Møre og Romsdal, men og positivt vedtak hos statsråd Erling Sande i Kommunal -og distriktsdepartementet. Då vert nok Halleluja-ropet frå fleire politikarar i Ålesund lite samanlikna med halleluja-ropet som vil kome frå folket på Ona og Sandøya som endeleg vert høyrt etter mange års kamp for ei etterlengta grensejustering.